Militante de Izquierda Republicana, nas eleccións locais de febreiro de 1936 é elixido concelleiro da Corporación Municipal de Arbo. O 8 de novembro de 1936, xunto a outros 10 homes, foi asasinado na Volta do Couto, en Tenorio, Cotobade. Nunca apareceu o corpo daqueles 11 inocentes defensores da democracia.
O domingo 6 de novembro, a partir das 11 horas na casade Telmo, situada no no Barrio da Curuxa da Parroquia de Barcela, en Arbo (coordenadas de localización: 42.099219988263194, -8.333218520900958) celebraremos unha homenaxe pública á figura deste home, a partir da demanda da súa familia, fillos e netos.
Quen era Telmo?
Telmo Rodríguez Alonso nacera na Torre, en Barcela. O seu pai era zapateiro, era unha familia humilde. Telmo sempre fora unha persoa dinámica, con ganas de facer cousas, pensando nos seus e tamén nas persoas da parroquia, na súa calidade de vida. Para buscarse a súa vida e a da súa familia, emigrara a Cuba. Alí, despois de traballar en diversos sectores, estivo bastantes anos vinculado aos Ferrocarriles de Cuba. O tempo que pasou na illa serviulle para facer algo se diñeiro para que a súa familia, os seus 3 fillos e a súa dona, puideran vivir dignamente.
Telmo volveu para Arbo,para Barcela e para a Coruxa, onde construira a súa casa, aínda en pé, no ano 1934. A casa levantouse anos antes de que Telmo volvera definitivamente para Barcela, mentres aínda estaba en Cuba.
A volta de Telmo para Arbo fora unha alegría para toda a familia. As súas dúas fillas Maruja, aínda viva, e Eugenia por fin ían ter ao «papá» na casa todos os días, e Emérita, a «mamá» ía sentir a presenza de Telmo para ter a familia completa. El xa non ía marchar máis a Cuba. Agora tocaba consolidar a familia, buscar a felicidade e seguir coa teima do ben común, aspecto que nunca deixou de estar na cabeza e na acción de Telmo Rodríguez Alonso. A familia ampliárona, pois no ano 1935 naceu o seu único fillo varón Manolo, aínda vivo na actualidade. E o ben común seguiuno buscando: de feito Telmo faise militante de Izquierda Republicana e desde febreiro de 1936 é nomeado concelleiro, membro da Corporación Municipal.
Qe lle pasou a Telmo?
Co levantamento dos fascistas, foi preso e xa nunca volveu ser libre. Primeiramente levárono para os improvisados calabozos do concello de Arbo. Alí conviviu varias semanas con ducias de detidos. Alí ía Emérita, a súa dona, todos os días levarlle comida e roupa limpa. Ás veces conseguía darlla directamente e outras veces nin tan sequera a deixaban entrar. Nesa rutina andaba a familia ata as últimas semanas do mes de outubro cando, sen previo aviso e sen comunicación, Telmo foi trasladado á Lazareto de San Simón, na Ría de Vigo. Alí estivo aproximadamente 15 días.
Emérita, a súa dona, esperou xustiza para que deixaran ao seu marido libre, pero non se produciu. O que ocorreu foi unha barbarie: o día 8 de novembro, Telmo e 10 homes máis, entre os que estaban 3 veciños e amigos de Arbo (Alfonso Alonso, Juan Alonso e José Gómez), e 7 compañeiros de Lalín, foron sacados do Lazareto e «paseados» en Tenorio, na Volta do Couto. Non había crimes dos que acusalos, non había probas de maldades que non cometeran, non houbera xuízo que os castigara, só había odio, exterminio selectivo e ausencia de moral. Foron baleados os 11 e coma cans ficaron na cuneta. Os asasasinos foran despois celebrar a súa fazaña, beber viño, se cadra cantar algún himno marcial e a bon seguro argallar novos «paseos», buscar novas vítimas inocentes.
Para recordar a este pai de familia, bo home, emprendedor e benfeitor social, coa presenza da súa familia, o día 6 de novembro o pobo de Arbo, e todos os amigos e amigas da xustiza, da liberdade, da demcoracia e da República, ímonos xuntar. O programa é o que aparece no cartaz anexo.
Se queres colaborar ecoomicamente, podes facer un Bizum ao 648094430. Se queres máis información podes escribirnos a memoria.historica.arbo@gmail.com.
Durante o acto interpretaranse diversas pezas musicais a cargo de intérpretes locais e ao final teremos un aperitivo para todos os asistentes